السلام عليكم و رحمة الله و بركاته
طريقة تحضير الحريرة المغربية
اليوم غنعطي طريقتي في تحضير الحريرة نزولا لطلب بعض الاخوات
المقادير
لحم مقطع طريفات صغار + بصلة محكوكة + ملعقة صغيرة ابزار + ملعقة صغيرة اسكينجبير + لقليل من خرقوم عود مدقوق + لقليل من زعفران مكعب + ملح + زيت الزيتون تقريبا أربع معالق كبار + ملعقة صغيرة سمن + معدنوس قزبر وكرافص + حمص مرطب ومقشر + لقليل من العدس + لقليل من شعرية رقيقة + طحين + الماء الكافي + خمس مطيشات مصلوقين ومطحونة ومصفية + ملعقة كبيرة من مطيشة الحك
الطريقة
في طنجرة الضغط ( كوكوط) كنوضع طريفات اللحم مع البصلة والتوابل والزيت ونصف ملعقة سمن ونقطع المعنوس مع قزبر وكرافص لسبق وغسلتهم مزيان ونشحر الكل ونضيف مطيشة المصفية مع مطيشة الحك والماء الكافي ونضيف الحمص مع العدس ونسد الكوكوط تقريبا 25 دقيقة فاش يطيب اللحم والحمص ونحل عليها ونكون خلطت الطحين مع الماء وصفيتو ونبدا نضيف وأنا كنحرك باش نعرف شكل الحريرة ماخاصهاش تكون تقيلة وماتكونش جارية ونشعل عليها ونبقى نحرك مرة مرة ونضيف الشعرية ونصف ملعقة سمن وندوق لاتكون ناقصة من الملح ونضيفها ونبقى نحرك حتى ماتبقاش تبان الكشكوشة من الفوق يعني أنها طابت وتقدم بالصحة والراحة نتمنى نكون وصلت الفكرة
انتضري قليلا و ضعي تعليق هنا :
0 التعليقات:
إرسال تعليق